ما هو سرطان القولون و المستقيم و ماهي أسبابه ؟

إيه هو القولون و المستقيم؟

الأمعاء (إللي هي مجرى الجهاز الهضمي) بتتقسم لأمعاء دقيقة و بييجي بعدها الأمعاء الغليظة، إللي الجزء الأكبر منها أسمه القولون. و القولون بينتهي بجزء بنسميه المستقيم إللي بيوصل مابين القولون و فتحة الشرج.

إزاي بيحصل سرطان في القولون و المستقيم؟

النسيج الداخلي للقولون هو تربة خصبة لنمو أنسجة غير طبيعية معروفة بالسليلة. و معظم الحالات إللي أكترهم من الرجالة فوق سن ال٥٠ عندهم سلائل. و معظمهم من النوع الحميد. لكن حجم السليلة هو إللي بيحدد خطورة التحول السرطاني. السليلة إللي أقل من ١سم ليها فرصة أقل من ١٪ إنها تبقى سرطانية. بينما إللي حجمهم أكتر من ٢سم ليها فرصة فوق ال٤٠٪.

إيه أسباب سرطان القولون و المستقيم؟

السبب الأساسي مش معروف لحد دلوقتي. لكن فيه أسباب تانية.

  1. أمراض أخرى:
    سرطان القولون و المستقيم ليه علاقة قوية مع أمراض تانية بتصيب الأمعاء زي وجود سليلة في نسيج القولون، أو تاريخ عائلي لوجود سلائل أو سرطان القولون و المستقيم، أو أمراض زي إلتهاب القولون التقرحي، داء كرونز، و سرطان الثدي و البنكرياس و المبايض.
  2. الوراثة:
    زي أي مرض سرطاني، الوراثة عامل قوي لنقل جينات سرطان القولون و المستقيم. و ده غالبا بيكون عن طريق توارث أمراض زي داء السلائل الورمي الغدي العائلي، متلازمة جاردنر، و متلازمة بوتز-جيجر. في كل الأمراض دي المريض بيصاب بسلائل في غشاء القولون في سن مبكر و لو متعالجش، مؤكداً هيتطور لسرطان.
  3. النظام الغذائي:
    رغم إن العلاقة مش واضحة لكن النظام الغذائي ليه تأثير أكيد على الإصابة بالمرض. الأبحاث بتقول إن إللي بياكلوا خضار و فواكه كتير فرصتهم أقل في الإصابة بالمرض، على عكس إللي بياكلوا لحوم و دهون كتير.
  4. العادات:
    التدخين و تناول المشروبات الكحولية ليه تأثير مباشر على زيادة فرصة الإصابة بالمرض.
  5. إصابة سابقة:
    لو
    في تاريخ بالإصابة بالسرطان ده بيزود فرصة حدوثه مرة تانية.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق