ماهو النوع الثاني من السكر, وماهي أسبابه و أعراضه وكيفية الحماية منه؟

ماهو النوع الثاني من السكر:

البنكرياس بينتج و يفرز في جسمك هرمون اسمه الأنسولين اللي بيساعد الخلايا إنها تستغل الجلوكوز في الدم و تحولوا لطاقة. في مرضى السكر من النوع التاني، البنكرياس بينتج الأنسولين، بس الخلايا مش بتعرف تستعمله، و بكده، بيعلّي مستوى السكر في الدم. الدكاترة بيسموا الحكاية دي “مقاومة الأنسولين”.

في البداية البنكرياس بتحاول تنتج كميات أكبر من الانسولين، لكن مابتقدرش تستمر في إنتاج كميات كبيرة و ده بينتج عنه تراكم السكر بكميات كبيرة في الدم.

عادة الاصابة بالنوع ده من مرض السكر بتكون بسبب عوامل مختلفة، زي العامل الوراثي مثلاً، اللي بيشكل سبب كبير في الإصابة بالسكر، ده غير عوامل تانية أهمها زيادة الوزن خصوصاً عند منطقة الوسط. و ده السبب الرئيسي في الإصابة بالسكر من النوع التاني بين صغار السن و الشباب، مش بس الكبار، و ده بسبب العادات الغذائية الغير السليمة و زيادة الوزن.

بعض الناس اللي بيعانوا من ارتفاع ضغط الدم و ارتفاع نسبة الكوليسترول و زيادة الوزن خصوصاً في منطقة الوسط بيعانوا من مقاومة الانسولين.

ده غير ان الكبد مسئول عن تخزين كميات السكر الزائدة عن الحاجة بعد الوجبات، و خلل وظيفه الكبد ممكن يعلّي نسبة السكر، أي خلل في وظيفة خلايا البنكرياس المسئولة عن انتاج الانسولين بيؤدي لارتفاع نسبة السكر في الدم و الاصابة بالنوع التاني من مرض السكر.

أسباب الإصابة بمرض السكر من النوع الثاني:

في حاجات ممكن تزود فرص الاصابة بالسكر، لكن مش شرط تتسبب في الاصابة بصورة مباشرة، بس كل ما زادت العوامل دي، كل ما كانت فرص الاصابة بالسكر اكبر، بعض العوامل دي لا يمكن التحكم فيها، زي:

  1. السن:
    لو السن فوق ال45 سنة
  2. العامل الوراثي:
    لو
    في اصابة بالسكر في الابوين او الاخوات

بس فيه عوامل تانية تخص صحتك و تاريخك المرضي و ممكن علاجها، زي:

  1. امراض القلب و الاوعية الدموية
  2. ارتفاع ضغط الدم
  3. انخفاض نسبة الكوليسترول الصحي
  4. ارتفاع نسبة الدهون الثلاثية
  5. زيادة الوزن او السمنة
  6. الاصابة بسكر الحمل
  7. تكيسات المبيض
  8. الاكتئاب

و فيه عوامل تخص اسلوب حياتك اليومية، و دي ممكن تتغير بسهولة، زي:

  1. قلة الحركة و عدم ممارسة الرياضة
  2. التدخين
  3. الضغط العصبي
  4. قلة النوم

الحماية من الإصابة بمرض السكر من النوع الثاني:

بس ممكن تحمي نفسك من الاصابة بالسكر عن طريق تغيير اسلوب حياتك و تناول الادوية بصورة منتظمة لو بتعاني من الضغط او امراض القلب، و ممكن تغيير حاجات بسيطة في اسلوب حياتك يعمل فرق كبير، مثلاً :

  • فقدان الوزن الزائد بنسبة 7-10 % ممكن يقلل فرص الاصابة بالسكر للنص.
  • الحركة، ممارسة الرياضة أو حتي المشي بتنشط العضلات و تحرق السكر في الدم، و ده بيقلل فرص الاصابة بالسكر بالتلت.
  • الاكل بطريقة صحية و تغيير عادات الاكل و تقليل الدهون و الزيوت و النشويات و المشروبات السكرية و الاطعمة الجاهزة و اللحوم الحمراء.
  • ايقاف التدخين، مع تجنب زيادة الوزن.

اعراض الاصابة بمرض السكر من النوع الثاني؟

اعراض مرض السكر ممكن تكون بسيطة و صعب ملاحظتها، وده سبب ان في ناس كتير عندهم السكر و ميعرفوش زي:

  1. العطش المستمر
  2. دخول الحمام المتكرر
  3. زغللة العين
  4. العصبية الزائدة
  5. الشعور بالتنميل في الايدين و الرجلين
  6. الشعور بالتعب و الارهاق
  7. بطء التئام الجروح
  8. الاصابة بالتهابات فطرية وصعوبة علاجها

إزاي ممكن نتأكد من الاصابة بالسكر؟

الدكتور ممكن يطلب تحليل دم ،صايم و فاطر و ممكن يطلب تكراره، و ممكن يتعمل تحليل لنسبة السكر التراكمي في الدم للشهرين أو ال3 شهور السابقين .

ايه هي مخاطر الاصابة بمرض السكر علي المدي الطويل؟

مع الوقت، ارتفاع نسبة السكر في الدم ممكن تؤثر علي:

  1. القلب و الشرايين.
  2. الكلي.
  3. العين و الابصار.
  4. الاعصاب:
    فممكن تعمل مشاكل في عملية الهضم و الاحساس في القدم و القدرة الجنسية.
  5. التئام الجروح.
  6. القدرة علي الحمل.

أفضل طريقة لتجنب المشاكل دي هي التعامل مع المرض بجدية، و الالتزام بمواعيد الادوية أو الانسولين، و قياس نسبة السكر بانتظام، و الاكل بطريقة صحية و المتابعة المستمرة مع الدكتور لمنع المضاعفات.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق