ما هو ارتفاع ضغط الدم، أنواعه ومضاعفاته؟

ما هو إرتفاع ضغط الدم؟

إرتفاع ضغط الدم هو مرض القلب الأكتر شيوعاً في العالم. ضغط الدم مقصود بيه قوة دفع الدم داخل الشرايين في الجسم. زي المياه في أي خرطوم أو الهواء في عجلة العربية، الشرايين تقدر تستوعب دفع الدم لدرجة ضغط معينة. و زي ما الهواء الزيادة ممكن يبوظ العجلة، الدم الزيادة ممكن يتسبب في ضرر للشرايين و ينتج عنه جلطات أو أمراض في القلب.

ممكن الاصابة بارتفاع ضغط الدم متسببش أي أعراض واضحة لمدة طويلة، بس الضرر بسبب ارتفاع ضغط الدم علي الاوعية الدموية و القلب بيكون موجود و بيتراكم مع الوقت و بيزود من مخاطر الاصابة بالجلطات و الازمات القلبية.

ارتفاع ضغط الدم عموماً بيتطور في وقت طويل و بيصيب معظم الناس مع تقدم السن. و معظم المصابين مش بيعانوا من أي أعراض واضحة بالرغم من ارتفاع ضغط الدم عندهم لمستويات خطيرة.

بعض الناس المصابين بارتفاع ضغط الدم ممكن يشتكوا من صداع متكرر أو ضيق بالتنفس أو نزيف من الأنف. بس كل الأعراض دي مش محددة و غالباً مش بتحصل غير بعد وصول ضغط الدم لمستويات شديدة الخطورة.

علشان كده، لازم المتابعة الدورية و قياس ضغط الدم علي الأقل مرة واحدة في السنة لكل الناس بعد سن 18 سنة، سواء عن طريق زيارة الدكتور للكشف الدوري أو عن طريق قياس ضغط الدم في الصيدليات.

أنواع ارتفاع ضغط الدم؟

فيه نوعين من ارتفاع ضغط الدم.

  1. أرتفاع ضغط الدم الأساسي :
    و ده اللي بيصيب معظم الناس، و بيتطور بالتدريج علي المدي الطويل.
  2. ارتفاع ضغط الدم الثانوي:
    بعض الناس بيصابوا بارتفاع ضغط الدم نتيجة لوجود مرض تاني. و في الحالة دي أرتفاع ضغط الدم بيبقي مفاجيء و أعلي من مستويات أرتفاع ضغط الدم الأساسي. وأسباب ارتفاع ضغط الدم الثانوي متعددة و منها:

    • توقف التنفس اثناء النوم و الشخير.
    • امراض الكلي.
    • امراض الغدة فوق الكلوية.
    • امراض الغدة الدرقية.
    • بعض أمراض الدم الوراثية.
    • بعض الادوية:
      زي حبوب منع الحمل و أدية البرد و أدوية الجيوب الانفية و بعض المسكنات
    • الادوية المخدرة و الممنوعات
    • الخمور و ادمان الكحول

إيه هي مضاعفات ارتفاع ضغط الدم؟

ضغط الدم المرتفع بيؤذي جدران الاوعية الدمية و بيؤذي أعضاء الجسم، و كل ما أستمر ضغط الدم المرتفع و كان أعلي، كل ما كانت المضاعفات أكبر و أخطر، ارتفاع ضغط الدم ممكن يتسبب في:

  1. الجلطات و الازمات القلبية، بسبب تصلب و ضيق الشرايين
  2. تمدد الأوعية الدموية، بسبب ارتفاع ضغط الدم، جدران الاوعية الدموية بتضعف و تمدد، و ممكن تنفجر و تسبب نزيف داخلي.
  3. فشل عضلة القلب، بسبب ارهاق القلب بصورة مستمرة لأنه بيقاوم ضغط دم عالي، فبيحصل تضخم لعضلة القلب و بعد كده العضلة المتضخمة بتضعف و تفشل.
  4. ضعف و ضيق شرايين الكلي، و النهاية فشل وظيفة الكلي
  5. تصلب و ضيق شرايين العين، و ضعف القدرة علي الابصار
  6. ضعف الذاكرة و التأثير علي وظائف المخ

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق